【選姊妹裙4大要點】歷屆明星婚禮上災難級姊妹裙!最忌...

分類 
婚禮籌備

關於姊妹裙點揀呢一環,實在比起自己揀婚紗更困難!揀得靚,又怕被搶風頭;揀得普通,又怕被姊妹暗暗嫌棄!唔想同人地一模一樣?就要留意以下幾個Tips,教你揀出令人「叮」一聲嘅姊妹裙款式。

 

01. 揀同款易出事?

出席人地婚禮又好,上網睇人地婚禮都好,普遍都係粉色系,飄逸雪紡、仙子感重既姊妹裙成為大熱首選。但我曾經聽過一個真實經歷,喺大旺日,同一時間,同一個地點,有幾十對新人加佢地嘅兄弟姊妹出門口,當大家嘅姊妹都係著同款裙嘅時候,情況混亂,竟然有姊妹認錯人、上錯花車…可能同兄弟姊妹剛剛認識唔太熟嘅關係,但實在太可怕了!!!

 

解決方法 1 :

喺芸芸「同色同款」嘅姊妹當中特圍而出,新人可以為佢地加一𠺌獨特嘅NAME TAG同或小配件。例如:可以將手花變成襟章,或者好似而家天氣涼左嘅時候,為佢地加番件特色既外套都會令人眼前一亮㗎!

 

解決方法2:

近年喺歐美都興玩不同嘅顏色,要襯款,例如:新娘子要揀同色嘅姊妹裙的話,都可以考慮以「由深到淺」嘅色調配襯,比起單一色調更為吸睛!

 

02. 揀錯款,姊妹敢怒不敢言?

好多新娘子事前都會將姊妹裙款做到一模一樣,望上去整整齊齊。但其實每個女仔嘅身型都有唔同,就好似瘦削嘅女仔唔會想著Deep V,腳粗嘅女仔唔會想著短裙一樣!有時喺網上不時都會見到姊妹喺朋友婚後討苦水話其實自己唔鍾意裙嘅款式。

 

解決方法:

婚前新娘子可以的話都盡量同姊妹Gathering,除左邊食邊講下Big Day當日點樣「作弄」一班男士之外,作為貼心新娘子就要就喺呢個開心氣氛之下,順便同姊妹一齊了解下你心儀嘅姊妹裙款色。經投票之後,再按各人需要作出調整,咁大家都會覺得你係一位非常sweet嘅新娘子!

 

03. 布料、色調最忽略?

好多時揀姊妹裙款都係以款式主導,其實布料同色調反而更需要考慮周詳。好似近年鍛布大行其道,挺身得黎又得體,成為了唔少新娘子首選布料之一。但試想像,姊妹們當日不停為你工作、奔走,鍛布相對重身嘅布料又係咪適合呢?色調方面,可能大家都會覺得相比起款色嚟講,略為唔重要,但如果係行型格線,鍾意冷色系如黑色嘅新人就要注意喇,結婚始終都係喜事,都要請示下四大長老嘅意見呀!

 

04. 實戰經歷!外在美定與實用性高並重

Girls!!! 你有無數過自己究竟有幾多條姊妹裙最後係扔左喺衣櫃,最終不見天日?我就實在太多喇! 為免出現浪費嘅情況,我一早已經諗好要揀一件著得番嘅姊妹褲!!!因為姊妹當日為我奔波,為左方便佢地,我就特登選擇左JUUMPSUIT,望上去得體之餘亦有型格感。

 

完婚後,咪以為呢件JUMPSUIT就從此長眠衣櫃,其實佢重著率好高架,好似平時出街著呀,公司ball都可以著得番,真心唔浪費!唔使同堆填區做朋友!

撰文:駐場Blogger - 人妻搜記

圖片來源:駐場Blogger - 人妻搜記、網上圖片